رباعيات صلاح جاهين
أشعار بالعامية المصرية
يا للي بتبحث عن اله تعبده
بحث الغريق عن أي شي نجده
الله جميل وعليم ورحمن ورحيم
احمل صفاته ... وانت راح تو جده
عجبي !!
حقرا وفوق كوكب حقير محتقر
في الكون تكون دنياكو ايه يابقر
رملايه من صحرا ؟.. لكين ايش تقول
والكون بحاله جوه عقل البشر
عجبي !!
لا تجبر الانسان ولا تخيره
يكفيه مافيه من عقل بيحيره
اللي النهارده بيطلبه ويشتهيه
هو اللي بكره يشتهي يغيره
عجبي !!
ياللي ف حماه الشمس تلقي الملاذ
والف بكره وبكره ... في ضلوعه لاذ
مين انت ؟ مارد ؟ رب؟ قال لأ ده بس
انا اللي باروي القمح واسقي الفولاذ
عجبي !!
غسل المسيح قدمك ياحافي القدم
طوبي لمن كانوا عشانك خدم
صنعت لك نعليك انا يا اخي
مستني ايه ... ماتقوم تدوس العدم
عجبي !!
البط شال عدي الجبال والبحور
ياما نفسي اهج .. أحج ويا الطيور
اوصيك ياربي لما اموت .. والنبي
ماتودنيش الجنه ... للجنه سور
عجبي !!
طال انتظاري للربيع يرجع
والجو يدفا والزهور تطلع
عاد الربيع عارم عرمرم شباب
ايه اللي خلاني ابتديت افزع
عجبي !!
لو انضنيت وفنيت وعمري انفرط
مش عاوز الجأ للحلول الوسط
وكمان شطط وجنون مانيش عاوز
يامين يقول لي الصح فين والغلط ؟
عجبي !!
عاد الربيع كأنه طعم الحب
والحب نار جوه العرق بتصب
اتمتع ازاي بيه وانا متقطع
من كتر خوفي لافي الخطيئه يطب ؟
عجبي !!
ازاي شبابنا يقوم وياخد دوره
من غير صراخ يئذيه ويجرح زوره
ياهلتري احسن له يقعد ساكت
او ينترك ولو خرج عن طوره ؟
عجبي !!
عيني رات عصفور ووياه ابنه
بيحدفه في الريح وياخده ف حضنه
نوبتين وتالت نوبه – عجبي عليهم –
كانوا سوا بيرفرفوا ويغنوا
عجبي !!
احسن مافيها العشق والمعشقه
وشويتين الضحك والتريقه
شفت الحياه , لفيت , لقيت الالذ
تغيرها , وده يعني التعب والشقا
عجبي !!
عجبي علي العجب العجيب العجاب
لما الحقيقه تطل بعد احتجاب
وتروق وتحلا وفجاه تصبح مافيش
كمثل طراطيش بحر ياما خد وجاب
عجبي !!
في الهوا ماشي يابهلوان اش اش
يافراشه منقوشه علي كل وش
شقلبت عقلي وعقلي شقلبني
وكنت بحسبني بقيت مااندهش
عجبي !!
وقفت ساعه الصبح باغسل سناني
قالت لي شوف قوتي ولمعاني
ايش تطلب اليوم مني ضحكه اسد ؟
والا ابتسامه اعلانات امريكاني ؟
عجبي !!
الحلو يم اليم صابح رايح
سارح في حضن الميه سابح سايح
الحلو داب فب البحر .. قلت ادوقه
وجدت لسه البحر برضك مالح
عجبي !!
ياكل كلمه للعجب في قاموس
انسكلوبيديا لسان عرب ولا روس
تعالوا نجده .. ده لسه في عصرنا
الشمس والبحر العريض بالفلوس
عجبي !!
الموج تلول تهبط وتطلع تلول
يابحر خدني الشط صاحبك ملول
والابلاش الشط ح اعمل به ايه
ده ريحته طحلب مهري وام الخلول
عجبي !!
عيني رات مخلوق في غايه البشاعه
انا قلت له لما تأملته ساعه :
اللذه والموت علموك اللزج
وانا علموني الفلسفه والشجاعه
عجبي !!
غطس وقب الموج نهود بمبي
من الف جيل جمالات ماتعلم بي
ياقلبي عيب دول امهاتنا القدامي
استغفر الله العظيم ربي
عجبي !!
علقت في المسمار قناع مهزله
ومعاه قناع ماساه بحزنه ابتلا
بصيت لقيتهم يشبهوا بعضهم
واهو ده العجب ياولاد .. والا فلا
عجبي !!
ظهر المسيح الحي علي سفح ربوه
ونزل بهاله الضي وقعد في قهوه
بصوا .. تعالوا.. قالوا خليه في حاله
الناس في حالهم يابني .. مالهمش دعوه
عجبي !!
لولا اختلاف الراي يامحترم
لولا الزلطين مالوقود انضرم
ولولا فرعين ليف سوا مخاليف
كان بينا حبل الود كيف اتبرم
عجبي !!
ياورده قلبي معاكي في الريح لعب
لا تعبتي م الريح ولا قلبي تعب
احنا كده : نرتاح في صخب الجنون
وفي السكون بنخاف قوي ونترعب
عجبي !!
ما انتاش بتلعب ليه ياروح بابا ؟
ولا عسكري ولا لص في عصابه
العب أسد أو ديب رهيب أو غزال
دي الدنيا في نهايه المطاف غابه
عجبي !!
ورد في ورق سلوفان ياحلوه اهديلك ؟
والا انقله بالطين في شتله واجيلك ؟
الاولاني لو وحا بحناني
عجبي علي التانيه بايه يوحيلك ؟
عجبي !!
انا قلبي كوكب وانطلق في المدار
حواليكي يامحبوبتي يانور ونار
يلف مهما يلف ما بيكتفيش
وتملي نصه ليل ونصه نهار
عجبي !!
الارض شوك ايوه لكين هايش
والحمره مش يعني الطريق حايش
دي دمنا السيال .. وبشره خير
ان انتي عايشه وان انا عايش
عجبي !!
ايه اللي خدته من مرور السنين
ياقلبي الادمعتك والانين
بتئن وبتفرح وترجع تحن
مع ان مش كل البشر فرحانين
عجبي !!
اوقات افوق ويحل عني غبايا
واشعر كاني فهمت كل الخبايا
وافتح شفايفي عشان اقول الدرر
ما أقولش غير حبه غزل في الصبايا
عجبي !!
مركب ورق من نفخه تتطوح
ركبتها والكل بيلوح
سوحت فيها اتنين وخمسين سنه
للان .. ولا بتغرق ولا تروح
عجبي !!
ع الجسر فت الصبح تحت الضباب
بين اللي بينغرس واللي طاب
مااهتز قلبي لنبت طالع جديد
قد اللي ماشي .. وتحت باطه الكتاب
عجبي !!
ياخالق الكون بالحساب والجبر
وخالقني ماشي بلختيار والجبر
كل اللي حيلتي زمزميه امل
وازاي تكفيني لباب القبر
عجبي !!
قاعده قناني الخمر ساكته وساهيه
مع ابن ادم في الشبه متناهيه
مفيش كده روقان في لحظه تشوفهم
وبعدها بلحظه يودوا ف داهيه
عجبي !!
حته محاره وجدتها في يوم لقيه
قالت لي شوف الطبيعه شقيه ؟
نظرت للكهف اللي فيها ولقيت
ان الطبيعه كمان .. لا اخلاقيه
عجبي !!
بليلتشو قال ايه بس فايده فنوني ؟
وتلات ورق مساحيق بيلونوني
والطبل والزمامير وكتر الجعير
اذا كان جنون زبوني زاد عن جنوني
عجبي !!
نقطه مراره وكمان علي مشروبي
دوبها ياساقي حسب مطلوبي
طعم الحياه .. مش برضه فيها وفيها ؟
ليالي وردي ونهارات خروبي ؟
عجبي !!
وسط الحطام اتفرجوا يا أنام
تمثال ملك .. ومبوله م الرخام
لتنين نحتهم نفس اسطي الحجر
وكانوا ذات يوم كتلتين لسه خام
عجبي !!
عيد والعمال اتنططوا ع القبور
لعبوا استغمايه .. ولعبوا بابور
وباللونات .. ونايلونات شفتشي
والحزن هيروح فين جنب السرور
عجبي !!
انا قلبي كوره .. والفراوده أكم
ياما اتنطح وانشطا .. وياما اتعكم
واقول له كله ح ينتهي في المعاد
يقول بساعتك ؟والاساعه الحكم ؟
عجبي !!
الضحك قال ياسم علي التكشير
امشير وطوبه وانا ربيعي بشير
مطرح ماباظهر بانتصر ع العدم
انشا لله اكون رسمايه بالطباشير
عجبي !!
اهوي الهوي وهمس الهوي في العيون
وبسمه المغرم .. ودمعه الحنون
وزلزلات الحب نهد الصبا
اكون انا المحبوب او لا اكون
عجبي!!
يا ملونين البيض في شم النسيم
لون الحنين والشوق وخمر النديم
ماتعرفوش سايق عليكوا النبي
تلونوا الايام بلون النعيم ؟
عجبي !!
الدنيا صندوق دنيا .. دور بعد دور
الدكه هي .. وهي كل الديكور
يمشي اللي شاف .. ويسيب لغيره مكان
كان عربجي او كان امبراطور
عجبي !!
قطي العزيز راقد علي الكنبات
في نوم لذيذ .. وبيلحس الشنبات
وانا كل عين فنجان مدلدق قلق
صدق اللي قال ان الحياه منابات
عجبي !!
قالوا السياسه مهلكه بشكل عام
وبحورها يابني خشنه مش ريش نعام
غوص فيهل تلقي الغرقانين كلهم
شايلين غنايم .. والخفيف اللي عام
عجبي !!
سلام سلام ... سلام سلام ... سلام
كلام كلام ... كلام كلام ... كلام
هز الورق ياصحبي كدهوه
يطلع كلام سلام .. وسلام كلام
عجبي !!
فوق تحت . ورا قدام . يمين شمال
في الجو . تحت الميه . او في الرمال
طلب الكمال يحرم علي الممكن
والممكنات دول محرومين م الكمال
عجبي !!
هات يازمان . وهات كمان يازمان
غير بسمه الشجعان مامني يبان
هو اللي داق الفرحه يوم ثورته
يقدر يعود ولا ثانيه للاحزان ؟
عجبي !!
عبثا باقول واقرا في سوره عبس
ماتلومش حد ان ابتسم او عبس
فيه ناس تقول الهزل يطلع جد
وناس تقول الجد يطلع عبث
عجبي !!
يومي علي الله تنتهي وتغيب
الشمس . وتعود تاني يوم لهاليب
زي الحياه . مأساه . ومن كترها
بقي لا انتهاءها وابتدائها عجيب
عجبي !!
علم اللوع اضخم كتاب في الارض
بس اللي يغلط فيه يجيبه الارض
اما الصراحه فامرها ساهل
لكن لا تجلب مال ولا تصون عرض
عجبي !!
انا كان لي اب وكان رئيس محكمه
ستين سنه . في قضيه واحده اترمي
ستين سنه وطلع براءة وخرج
يشكي الحياه والموت لرب السما
عجبي !!
قالوا ابن ادم روح وبدنه كفن
قالوا لا بدن . قالوا لأ ده روح في بدن
رفرف فؤادي مع الريات في الهوا
انا قلت لا روح في بدن في وطن
عجبي !!
موضوع: رباعيات صلاح جاهين الجزء 3 
2007-07-22, 2:14 pm
